Шу қалалық емханасы
Денсаулық сақтау жаңалықтары
30.01.2026
ӘМСҚ өкілдері медицина ұйымдарымен өзекті мәселелерді талқылады
Жамбыл облысында «Әлеуметтік медициналық сақтандыру қоры» КЕАҚ-ның ұйымдастыруымен Қормен келісімшарт жасасқан медицина ұйымдары басшыларының қатысуымен жиын өтті. Іс-шараға Қордың Жамбыл облысы бойынша филиалының директоры Ғайни Аймағанбетова, филиалдың құрылымдық бөлім басшылары, сондай-ақ өңірдегі медициналық ұйымдардың жетекшілері қатысты.
Басқосуда «Әлеуметтік медициналық сақтандыру қоры» КЕАҚ-ның Жамбыл облысы бойынша филиалының директоры Ғайни Аймағанбетова кіріспе сөз сөйлеп, міндетті әлеуметтік медициналық сақтандыру жүйесінің халық үшін маңыздылығына тоқталды. Сонымен қатар Қор мен медицина ұйымдары арасындағы тиімді әрі өзара сенімге негізделген әріптестіктің сапалы медициналық көмекті қамтамасыз етудегі шешуші рөлін атап өтті.
«Міндетті әлеуметтік медициналық сақтандыру жүйесінің тиімді жұмыс істеуі Қор мен медициналық ұйымдардың ашық, жауапты және нәтижеге бағытталған өзара іс-қимылына тікелей байланысты. Басты мақсатымыз – халыққа көрсетілетін медициналық қызметтердің сапасы мен қолжетімділігін арттыру. Осы орайда келісімшарттық міндеттемелердің орындалуына, медициналық көмекті ұйымдастырудағы жүйелі мәселелерге және медицина ұйымдары тарапынан ұсынылатын бастамаларға ерекше назар аударылады. Бүгінгі кездесу – ортақ мәселелерді ашық талқылап, оларды бірлесіп шешуге мүмкіндік беретін маңызды диалог алаңы», – деді филиал директоры.
Кездесуде МӘМС-ке қатысты өзекті мәселелер жан-жақты қарастырылды. Атап айтқанда, халыққа көрсетілетін медициналық қызметтердің сапасы мен қолжетімділігін арттыру, медициналық көмекті ұйымдастыру тетіктерін жетілдіру, сондай-ақ Қормен жасалған келісімшарттық міндеттемелердің орындалуы күн тәртібіне қойылды.
Кері байланыс форматында өткен жиында қатысушылар өз ұсыныстары мен пікірлерін ортаға салып, өзара іс-қимылды нығайтуға бағытталған бірқатар бастамаларды ұсынды.
Айта кетейік, 2026 жылы Қордың Жамбыл облысы бойынша филиалы 108 медициналық мекемемен келісімшарт жасасқан. Оның ішінде 37-і мемлекеттік, 71-і жекеменшік медициналық ұйымдар.
