МӘМС

Өкпе обыры – өкпе тіндерінде қатерлі жасушалардың бақылаусыз өсуінен пайда болатын онкологиялық ауру. Аурудың бастапқы кезеңінде белгілері байқалмауы немесе басқа тыныс алу ауруларына ұқсас болуы мүмкін. Сондықтан өкпе обырын ерте анықтау үшін профилактикалық тексерулерден өтіп тұру маңызды.

Негізгі қауіп факторлары:

• темекі шегу және пассивті темекі түтініне жиі ұшырау;

• өндірістік зиянды заттармен ұзақ уақыт жұмыс істеу;

• ауаның ластануы;

• тұқым қуалайтын бейімділік;

• өкпенің созылмалы аурулары.

Назар аударуды қажет ететін белгілер:

• ұзақ уақытқа созылатын жөтел;

• қақырықта қанның пайда болуы;

• ентігу, тыныс алудың қиындауы;

• кеуде тұсының ауыруы;

• дауыстың қарлығуы;

• себепсіз салмақ жоғалту;

• әлсіздік пен тез шаршау.

Аталған белгілердің болуы міндетті түрде өкпе обыры дегенді білдірмейді. Алайда олар ұзақ уақыт сақталса, дәрігерге қаралып, қажетті тексерулерден өту қажет.

Ерте диагностика өте маңызды

Өкпе обырын бастапқы кезеңінде анықтау емнің тиімділігін арттырып, науқастың өмір сүру мүмкіндігін жоғарылатады. Әсіресе қауіп тобына жататын азаматтарға дәрігердің кеңесімен профилактикалық тексерулерден өту ұсынылады.

Өзіңіздің денсаулығыңызға бейжай қарамаңыз!

Темекіден бас тартып, салауатты өмір салтын ұстану, еңбек қауіпсіздігі талаптарын сақтау және медициналық тексерулерден уақытылы өту – өкпе обырының алдын алудағы маңызды қадамдар.

Денсаулығыңызда күмән тудыратын өзгерістер байқалса, өз бетінше емделмей, медициналық ұйымға жүгініңіз.