Денсаулық сақтау жаңалықтары

Артериялық гипертензия – қан қысымының тұрақты түрде жоғарылауы. Егер қан қысымы бірнеше рет өлшегенде 140/90 мм сын.бағ. және одан жоғары болса, бұл артериялық гипертензияның белгісі болуы мүмкін. Бұл ауру көбіне ұзақ уақыт бойы ешқандай белгілерсіз өтетіндіктен, оны «үнсіз жау» деп те атайды.

Артериялық гипертензияның белгілері:

Бас ауруы, әсіресе желке тұсының ауырсынуы;

Бас айналу;

Құлақтағы шу;

Көздің бұлдырауы;

Жүрек қағуы;

Әлсіздік, тез шаршағыштық.

Алайда көптеген адамдарда ауру ешбір белгісіз өтуі мүмкін. Сондықтан қан қысымын тұрақты түрде өлшеп отыру өте маңызды.

Қауіп факторлары:

Тұқым қуалаушылық;

Артық салмақ пен семіздік;

Дұрыс тамақтанбау, тұзды көп тұтыну;

Темекі шегу және алкогольді шамадан тыс пайдалану;

Қимыл-қозғалыстың аздығы;

Созылмалы күйзеліс;

Қант диабеті мен қандағы холестерин деңгейінің жоғары болуы.

Неліктен қауіпті?

Емделмеген немесе бақылаусыз қалған жоғары қан қысымы:

Инсультке;

Жүрек инфарктісіне;

Жүрек жеткіліксіздігіне;

Бүйрек қызметінің бұзылуына;

Көру қабілетінің төмендеуіне әкелуі мүмкін.

Алдын алу жолдары:

Қан қысымын жүйелі түрде бақылаңыз;

Тұзды тәулігіне 5 грамнан артық қолданбаңыз;

Көкөніс пен жеміс-жидекті көбірек тұтыныңыз;

Белсенді өмір салтын ұстанып, күн сайын кемінде 30 минут дене белсенділігімен айналысыңыз;

Темекіден бас тартып, алкогольді шектеңіз;

Дене салмағын қалыпты деңгейде ұстаңыз;

Дәрігер тағайындаған дәрілерді үзбей қабылдаңыз.

Есіңізде болсын!

Артериялық гипертензияны ерте анықтау және уақытылы емдеу жүрек-қан тамырлары ауруларының ауыр асқынуларының алдын алуға мүмкіндік береді. Өз денсаулығыңызға жауапкершілікпен қарап, қан қысымыңызды тұрақты бақылауда ұстаңыз!