Автор: gpshu

МӘМС-ке не кіреді?

Posted on by gpshu
МӘМС пакетіне не кіреді? Бейінді мамандардың кеңесі мен тексерулерден бастап күрделі ота мен оңалтуға дейін. Карусельде қандай көмек түрін алуға болатынын айтамыз.
🛡️ Қазақстандағы МӘМС моделі бірегей. Еліміздегі медициналық сақтандыру жүйесі терапевтке қаралудан бастап, озық операциялар мен қажетті дәрі-дәрмектерге дейінгі медициналық көмектің шектеусіз тізбегін алуға мүмкіндік береді.
🌍 Әлемдік практикада әдетте екі сценарийдің бірі басым: сақтандырумен кепілдендірілген медициналық көмек тізбегі не қатаң шектеледі, не кең ауқымды кепілдік пациент тарапынан ішінара қосымша төлем жасауды көздейді. Біздің жүйе бастапқы медициналық көмектен бастап, кардиохирургия, нейрохирургия немесе буындарды ауыстыру сияқты жоғары технологиялық операциялар мен технологияларға дейінгі қолжетімді медициналық көмек принципін қамтамасыз етіп, кедергіні сәтті еңсереді.
👉 Толығырақ білу үшін карточкаларды парақтаңыз.

ТУБЕРКУЛЕЗДЕН САҚТАНАЙЫҚ!

Posted on by gpshu
Туберкулез – көбіне өкпені зақымдайтын, ауа арқылы таралатын жұқпалы ауру. Дер кезінде анықталып, дұрыс ем қабылданған жағдайда туберкулезді емдеуге болады.
⚠️ Негізгі белгілеріне назар аударыңыз:
• 2 аптадан ұзаққа созылған жөтел;
• дене қызуының ұзақ уақыт жоғары болуы;
• түнде көп терлеу;
• әлсіздік, тез шаршау;
• тәбеттің төмендеуі және салмақ жоғалту;
• кеуде тұсының ауырсынуы;
• қақырықта қанның байқалуы.
🩺 Осындай белгілердің бірі байқалса, өздігінен ем қабылдамай, міндетті түрде дәрігерге қаралыңыз. Туберкулезді ерте анықтау – тиімді емделудің және инфекцияның таралуын болдырмаудың маңызды шарты.
🔬 Алдын алу үшін:
• профилактикалық медициналық тексерулерден уақытылы өтіңіз;
• балаларға БЦЖ вакцинациясын ұлттық егу күнтізбесіне сәйкес алыңыз;
• бөлмені жиі желдетіп, тазалық сақтаңыз;
• дұрыс тамақтанып, салауатты өмір салтын ұстаныңыз;
• жөтелу және түшкіру кезінде санитариялық-гигиеналық талаптарды сақтаңыз.
💚 Өз денсаулығыңызға жауапкершілікпен қараңыз! Туберкулездің алдын алу – әр адамның өзінен басталады.

МӘМС қарапайым тілде

Posted on by gpshu
«МӘМС қарапайым тілде» деп аталатын көлемді материал дайындадық. Мақалада медициналық сақтандыруға қатысты негізгі сұрақтарға жауап жинақталған.
Сіз аударған жарна қайда жұмсалады? ТМККК мен МӘМС пакетіне не кіреді? Кім және қанша төлейді? Қажетті тексеруден немесе емнен қалай өтуге болады? Егер сізге медициналық көмек көрсетуден бас тартса немесе оның ақысын төлеуді ұсынса, не істеу керек?
Жүйенің қалай жұмыс істейтінін және өз құқықтарыңызды қорғау үшін қайда жүгіну керегін түсіндіреміз.
Материалды Қор сайтынан (msqory.kz) оқи аласыз.
Егер материалды оқып шыққаннан кейін сұрақ қалса, біздің сайтта «МӘМС-гид» нұсқаулық бөлімі бар. Ал «Өтініш беру» сервисі арқылы Қорға тікелей жүгіне аласыз.

ДЕНСАУЛЫҚ ӨЗІҢНЕН БАСТАЛАДЫ

Posted on by gpshu

Төле би атындағы орта мектеп оқушыларымен жасөспірімдердің репродуктивті денсаулығы және адам папиллома вирусы (АПВ) тақырыптарында ақпараттық-түсіндіру жұмыстары жүргізілді.

✨ Кездесу барысында оқушыларға өз денсаулығына жауапкершілікпен қарау, жеке гигиенаны сақтау, салауатты өмір салтын ұстану және АПВ-ның алдын алу жолдары туралы маңызды ақпараттар берілді.

🩺 Сонымен қатар, АПВ вакцинациясының маңызы түсіндіріліп, оқушылардың сұрақтарына жауап берілді.

Жас ұрпақтың дені сау болуы — баршамызға ортақ міндет!

💙 Денсаулығыңды қорға — болашағыңды ойла!

ҚҰТЫРУДАН САҚТАНАЙЫҚ!

Posted on by gpshu
Құтыру – орталық жүйке жүйесін зақымдайтын, аса қауіпті жұқпалы ауру. Ауру көбіне құтырған немесе вирус жұқтырған жануардың тістеуі, тырнауы немесе сілекейінің жарақаттанған теріге және шырышты қабатқа түсуі арқылы адамға жұғады.
⚠️ Құтырудың ең қауіпті ерекшелігі – аурудың клиникалық белгілері пайда болғаннан кейін оның соңы өлімге әкелуі мүмкін. Сондықтан жануармен байланыстан кейін уақыт жоғалтпай медициналық көмекке жүгіну өте маңызды.
🐕 Құтырудың алдын алу үшін:
үй жануарларын уақытылы ветеринарлық тексеруден өткізіп, құтыруға қарсы вакцинация жасатыңыз;
қараусыз және жабайы жануарларға жақындамаңыз;
жануардың мінез-құлқындағы әдеттен тыс өзгерістерге сақ болыңыз;
балаларға бейтаныс жануарларды ұстамау керектігін түсіндіріңіз;
үй жануарыңызды өз бетіңізше көшеге жібермей, бақылауда ұстаңыз.
🩹 Егер жануар тістеп немесе тырнап алса:
Жараны дереу сабынмен және ағын сумен мұқият жуыңыз.
Жараны өз бетіңізше қатты таңып немесе тіктіріп тастамаңыз.
Мүмкіндігінше тез арада медициналық ұйымға жүгініңіз.
Дәрігердің тағайындауы бойынша құтыруға қарсы профилактикалық екпелерді толық алыңыз.
❗ Жануардың сау немесе құтырғанын өз бетіңізше анықтауға болмайды. Тістеген жануар үй жануары болса да, медициналық көмекке жүгінуді кейінге қалдырмаңыз.
💚 Құтырудың алдын алудың ең тиімді жолы – жануарлармен қауіпсіз қарым-қатынас жасау және жануармен байланыстан кейін медициналық көмекті дер кезінде алу.
Денсаулыққа жауапкершілікпен қарайық! Құтырудан сақтанайық!

ТҰМАУДАН САҚТАНАЙЫҚ!

Posted on by gpshu
Күз-қыс мезгілінде тұмау және басқа да жедел респираторлық вирустық инфекциялар жиі таралады. Тұмау – дене қызуының күрт көтерілуі, бас ауруы, әлсіздік, бұлшықет пен буындардың сырқырауы, жөтел және тамақ ауруы сияқты белгілермен сипатталатын жұқпалы ауру.
🦠 Тұмау ауа-тамшы жолы арқылы тез таралады. Адам жөтелгенде, түшкіргенде немесе сөйлескенде вирус қоршаған ортаға таралып, басқа адамдарға жұғуы мүмкін.
🛡️ Тұмаудың алдын алу үшін:
• қолды сабынмен жиі және мұқият жуыңыз;
• адамдар көп жиналатын орындарда сақтық шараларын ұстаныңыз;
• бөлмені жиі желдетіп, таза ауа кіргізіңіз;
• дұрыс тамақтанып, жеткілікті ұйықтауға тырысыңыз;
• жөтелгенде немесе түшкіргенде ауыз-мұрныңызды майлықпен не шынтақтың бүгілген жерімен жабыңыз;
• науқас адамдармен жақын қарым-қатынасты шектеңіз;
• тұмауға қарсы вакцинациядан өту мүмкіндігін қарастырыңыз.
🌡️ Дене қызуы көтеріліп, жөтел, әлсіздік, тамақ ауруы сияқты белгілер байқалса, ауруды асқындырмай, өздігінен ем қабылдамай, медицина маманына жүгініңіз.
❤️ Өзіңіздің және жақындарыңыздың денсаулығына жауапкершілікпен қараңыз. Тұмаудың алдын алу – аурудың алдын алудың ең тиімді жолдарының бірі!

«МӘМС: керек дерек»

Posted on by gpshu
Әлеуметтік медициналық сақтандыру қоры «МӘМС: керек дерек» жаңа айдарын іске қосты. Бұл айдарда Қор қызметкерлері өзекті сұрақтарға жауап беріп, алгоритмдер мен ережелерді қарапайым әрі түсінікті тілде түсіндіріп отырады.
Алғашқы жазбада ұзақ демалыстан кейін жұмысқа шыққанда МӘМС жүйесіндегі мәртебені тексерудің маңыздылығы туралы айтамыз.

Қарттар күні – жүрекке жылу сыйлайтын ерекше мереке

Posted on by gpshu

Қарттар күніне орай емханамызда ардақты қарияларымызға құрмет көрсетіп, шағын дастархан жайып, тәтті бауырсақ пен хош иісті шайымызды ұсындық. ☕️🥯

Ақ дастархан басында үлкендерімізбен еркін әңгімелесіп, өткен күндерден естелік айтып, ақ баталары мен жылы тілектерін тыңдап, әдемі әңгіме-дүкен құрдық. ❤️

Бұл – үлкенге деген құрмет пен ізеттіліктің, мейірім мен адамгершіліктің кішкентай ғана көрінісі.

🌿 Қариясы бар үйдің – қазынасы бар.
Барша ақ жаулықты әжелеріміз бен ақ сақалды аталарымызға зор денсаулық, ұзақ ғұмыр, отбасыларына амандық пен береке тілейміз!

Қарттарымыздың әрбір күні қуанышқа, әрбір шаңырағы жылулыққа толы болсын!

Жамбылда Қарттар күніне орай «Денсаулық аралы» акциясы өтті

Posted on by gpshu
1 қазан – Халықаралық қарттар күніне орай Әлеуметтік медициналық сақтандыру қорының Жамбыл облысы бойынша филиалы облыстық №2 Арнаулы әлеуметтік қызметтер ұсыну орталығында (Қарттар үйі) «Денсаулық аралы» акциясын өткізді.
Акцияның мақсаты – қарттардың денсаулығына көңіл бөлу, медициналық мәселелері бойынша кеңес беру және олардың денсаулыққа қатысты сауалдарына жауап беру.
Іс-шара барысында №2 қалалық емхананың невропатолог, дерматолог, психолог және эндокринолог дәрігерлері орталық тұрғындарына медициналық кеңес беріп, денсаулық жағдайына қатысты сұрақтарына жауап берді.
Қариялар мамандарға өздерін толғандырған сауалдарын қойып, қажетті кеңестер алды. Іс-шара соңында ақ баталарын беріп, ұйымдастырушыларға алғыстарын білдірді.
Қарттарға қамқорлық көрсету, олардың денсаулығы мен әл-ауқатына көңіл бөлу – қоғамның маңызды міндеттерінің бірі.
Іс-шара барысында қарияларға ерекше көңіл бөлініп, оларға жылы лебіздер мен ізгі тілектер айтылды.

ТЕРРОРИЗМ МЕН ЭКСТРЕМИЗМНІҢ АЛДЫН АЛУ – БАРШАМЫЗҒА ОРТАҚ МІНДЕТ

Posted on by gpshu
Терроризм мен экстремизм – қоғамның тұрақтылығы мен қауіпсіздігіне қатер төндіретін қауіпті құбылыстар. Оның алдын алу үшін әр азамат сақтық танытып, ақпаратты дұрыс саралай білуі маңызды.
📌 Экстремизм – қоғамдағы қалыптасқан тәртіп пен тұрақтылыққа қарсы бағытталған радикалды көзқарастар мен әрекеттердің таралуы.
📌 Терроризм – халық арасында үрей туғызуға, қоғамдық қауіпсіздікті бұзуға және адамдардың өмірі мен денсаулығына қауіп келтіруге бағытталған қылмыстық әрекет.
⚠️ Әсіресе жастардың әлеуметтік желілердегі күмәнді ақпараттар мен радикалды идеялардың ықпалына түсіп қалмауына ерекше мән берген жөн. Бейтаныс адамдардың ұсыныстарына сақтықпен қарап, күмәнді діни немесе экстремистік мазмұндағы материалдарды таратпау қажет.
🔐 Қауіпсіздік үшін:
• күмәнді ақпаратты таратпау және оған бірден сенбеу;
• әлеуметтік желілердегі бейтаныс адамдардың шақыруларына сақ болу;
• радикалды мазмұндағы материалдардан аулақ болу;
• балалар мен жасөспірімдердің интернеттегі қауіпсіздігіне көңіл бөлу;
• күдікті жағдай байқалған жағдайда тиісті органдарға хабарлау.
🤝 Қоғамдық қауіпсіздік әр адамның жауапкершілігінен басталады. Терроризм мен экстремизмнің алдын алу үшін құқықтық сауаттылықты арттырып, бейбітшілік пен өзара құрмет құндылықтарын дәріптеу маңызды.
Бейбітшілік пен қауіпсіздік – баршамызға ортақ құндылық!