Рубрика: МӘМС

МӘМС аясында балаларға стоматологиялық көмек көрсетіледі

Posted on by gpshu
18 жасқа дейінгі балаларға стоматологиялық көмек Міндетті әлеуметтік медициналық сақтандыру (МӘМС) жүйесі шеңберінде көрсетіледі.
Шұғыл жағдайларда медициналық көмек тегін және белгіленген тәртіпке сәйкес қысқа мерзімде ұсынылады.
МӘМС аясындағы стоматологиялық қызметтер:
• жедел тіс ауруын емдеу;
• пульпит, периодонтитті емдеу;
• тісті жұлу (көрсеткіш бойынша);
• тісжегіні емдеу және пломба салу;
• сүт және тұрақты тістерді емдеу;
• жансыздандыру;
• профилактикалық тексерулер мен алдын алу шаралары.
Аталған қызметтер мемлекеттік стоматологиялық емханаларда және МӘМС жүйесімен келісімшарт жасасқан жекеменшік стоматологиялық клиникаларда көрсетіледі.
Балалардың денсаулығы – басты назарда.
#МӘМСЖАМБЫЛ #ОСМСЖАМБЫЛ

Бизнес үшін ұжымның МӘМС-тегі мәртебесі неге маңызды?

Posted on by gpshu
Кәсіпкерлер көбіне бизнес-процестердің үздіксіз жүруі мен табыс табуға баса назар аударады. Алайда компанияның қызметіне әсер етуі мүмкін бір маңызды тәуекел назардан тыс қалып жатады. Бұл – ұжымның денсаулығы.
Компания ресурстарынан айырылғанда жекелеген операциялар тоқтайды, мерзімдер бұзылады, тіпті келісімдер де жүзеге аспай қалуы мүмкін.
Сондықтан ең құнды актив – қызметкерлер. Егер оларға медициналық көмек қажет болса, олардың қорғалған болуы аса маңызды.
Қызметкерлеріңіз үшін жарналар мен аударымдар төлей отырып, сіз оларға МӘМС жүйесіндегі медициналық қызметтерді қолжетімді етесіз, ал өзіңіз үшін тұрақтылық пен қызметкерлердің амандығын қамтамасыз етесіз.
Дені сау ұжым – мықты бизнес! 🤝

Қазақстанда 3,6 миллионға жуық адам МӘМС жүйесіне қатыспайды

Posted on by gpshu
Қазір Қазақстанда 3,6 миллионға жуық адам МӘМС жүйесіне қатыспайды. Олардың шамамен 1 миллионы – әлеуметтік жағдайы дағдарыстық (D) және шұғыл (E) деңгейдегі тұрғындар. Яғни олардың МӘМС жарналарын төлеуге мүмкіндігі жоқ.
2026 жылдан бастап бұл азаматтар үшін МӘМС жарналарын жергілікті атқарушы органдар төлейді. Осылайша оларға сақтандырылған мәртебесі беріліп, МӘМС аясында қажетті медициналық көмек ала алады.
Бұдан бөлек, жергілікті бюджет есебінен ресми тіркелген жұмыссыздар үшін жарна төленетін болады. Бұған дейін бұл төлемдер республикалық бюджеттен түсіп келді.
❗Сақтандырылған азаматтар үшін диагностика, дәрігерлердің кеңесі, жоспарлы операциялар, емдеу және оңалту қызметтері МӘМС аясында тегін көрсетілетінін есте сақтаңыздар. Медициналық көмек алу үшін тұрғылықты жеріңіз бойынша емханаға тіркелу қажет.

Жекеменшік клиникаларда күрделі операциялар сәтті жүргізілуде

Posted on by gpshu
Міндетті әлеуметтік медициналық сақтандыру (МӘМС) жүйесі енгізілгеннен бері жамбылдықтар медициналық көмекті тек мемлекеттік мекемелерден ғана емес, сонымен қатар жекеменшік клиникалардан да алу мүмкіндігіне ие болды. Бұл – сақтандыру жүйесінің басты артықшылықтарының бірі.
Пациент тіркелген емханасы арқылы МӘМС аясында қызмет көрсететін кез келген медициналық ұйымға жолдама ала алады. Мұндай жағдайда азамат медициналық қызмет үшін ақы төлемейді, себебі шығындар Әлеуметтік медициналық сақтандыру қоры есебінен өтеледі.
Тұрар Рысқұлов ауданының тұрғыны Динара Есимова жоспарлы түрде «Эскулап» емдеу орталығында гинекологиялық ота жасатты. Пациенттің айтуынша, ота сәтті өткен, ал науқастың жағдайы жақсы, үйге шығуға дайындалып жатыр.
Айта кетейік, бұл ота МӘМС жүйесі аясында тегін жүргізілді.

Пациент құқығы: Пациенттерді қолдау қызметі қалай жұмыс істейді?

Posted on by gpshu
Әрбір азамат сапалы және қауіпсіз медициналық көмек алуға құқылы. Бұл құқық Қазақстан Республикасының «Халық денсаулығы және денсаулық сақтау жүйесі туралы» Кодексінде бекітілген. Дегенмен, тәжірибе көрсеткендей, медициналық қызмет сапасына, қызмет көрсету тәртібіне немесе медициналық персоналмен қарым-қатынасқа қатысты сұрақтар туындап жатады.
Мұндай жағдайда пациенттердің құқығын қорғау үшін медициналық ұйымдарда Пациенттерді қолдау қызметі жұмыс істейді. Бұл қызмет әлеуметтік медициналық сақтандыру қорының Жамбыл облыстық филиалының бақылауында. Филиал директоры Ғайни Аймағанбетова атап өткендей, қызмет пациенттердің құқықтарын қорғауға және медициналық көмектің сапасын бақылауға бағытталған.
✅Қызметке келесі жағдайларда жүгінуге болады:
Медициналық көмектің сапасына қанағаттанбаған жағдайда;
Медицина қызметкерлерінің дөрекі немесе әдепсіз қарым-қатынасына тап болғанда;
Медициналық көмектің сапасы немесе көрсетілу тәртібіне қатысты өзге мәселелер туындағанда.
✅Пациенттерді қолдау қызметінің негізгі міндеттері:
Өтініштер мен шағымдарды жедел қарау;
Мәселелерді «Осы жерде және қазір» қағидаты бойынша шешу;
Құрылымдық бөлімше басшыларының уақытылы әрекет етуін қамтамасыз ету;
Өтініштерді комиссиялық тәртіпте объективті қарау.
Қор филиалы басшысы атап өткендей, барлық өтініштер қаралып, ресми жауап ұсынылады және пациенттердің құқықтары толық қорғалады.
Дереккөз: https://08info.kz/
#МӘМСЖАМБЫЛ #ӘМСҚЖАМБЫЛ

Қате немесе артық төленген МӘМС жарналарын қайтарып алуға болады?

Posted on by gpshu
Бұл қызмет «Азаматтарға арналған үкімет» мемлекеттік корпорациясы арқылы жүзеге асырылады. Ол үшін Мемлекеттік корпорацияға қағаз түрінде өтініш беру қажет.
📝 Егер сіз дербес төлеуші болсаңыз, өтініш үлгі бойынша толтырылады.
📝 Ал жұмыс беруші арқылы өтініш берілген жағдайда, қызметкердің қаражатын қайтаруға берген келісімі қоса тіркелуі тиіс.
Мемлекеттік корпорацияның мекенжайлары мен өтініш үлгілері Әлеуметтік медициналық сақтандыру қорының ресми сайтында бар.
Қаражат өтініш берілген күннен бастап 15 жұмыс күні ішінде қайтарылады.
Қаражатты қайтарудан бас тартатын кездер болады. Оның себептері мыналар:
— МӘМС жарналары бойынша бұрынғы төленбеген кезеңдер үшін берешек болса;
— құжаттарда мәліметтер дұрыс көрсетілмесе;
— өтініш заңнама талаптарына сәйкес келмесе;
— дербес деректерді өңдеуге келісім болмаса.
#МӘМСЖАМБЫЛ #ӘМСҚЖАМБЫЛ

МӘМС арқылы жекеменшік клиникаларда ем алуға бола ма?

Posted on by gpshu
«Эскулап» емдеу орталығының бас дәрігерінің ұйымдастыру-әдістемелік жұмыстар жөніндегі орынбасары Гүлзада Абаева орталықта міндетті әлеуметтік медициналық сақтандыру (МӘМС) жүйесі аясында тұрғындарға ұсынылатын қызмет түрлері туралы айтып өтті.
МӘМС жүйесі енгізілгеннен бері жамбылдықтар медициналық көмекті тек мемлекеттік мекемелерден ғана емес, сонымен қатар жекеменшік клиникалардан да алу мүмкіндігіне ие. Бұл – сақтандыру жүйесінің басты артықшылықтарының бірі.
Пациент тіркелген емханасы арқылы МӘМС аясында қызмет көрсететін кез келген медициналық ұйымға жолдама ала алады. Мұндай жағдайда азамат медициналық қызмет үшін ақы төлемейді, себебі шығындар Әлеуметтік медициналық сақтандыру қоры есебінен өтеледі.
Егер тіркелген емханада қажетті бейінді маман болмаса немесе диагностика жүргізуге арналған жабдық жеткіліксіз болса, пациент басқа клиникаға жіберіледі. Мысалы, кейбір учаскелік емханаларда тұрғындар саны аз болғандықтан тар бейінді дәрігерлер жұмыс істемейді немесе УДЗ, рентген сияқты құрылғылар қарастырылмаған. Осындай жағдайда тұрғындар келісім бойынша жұмыс істейтін медициналық ұйымдарға жолданады.
Сонымен қатар емханада маман мен құрал-жабдық болғанымен, қабылдауға жазылу бірнеше айға созылып кетсе, бұл тетік тағы да қолданылады. Дәрігердің еңбек демалысына шығуы немесе аппараттың уақытша істен шығуы кезінде де пациент балама клиникаға жолдама сұрай алады.
Айта кету керек, пациент тек Қордың жеткізушілер базасына енгізілген жекеменшік клиникаларға ғана жіберіледі. Бұл үшін тіркелген емхананың алдын ала келісімшарт жасауы міндетті емес – жолдама берілген сәтте ақпараттық жүйе арқылы келісім автоматты түрде рәсімделеді.
Жекеменшік клиникаларда тұрғындар консультативтік және диагностикалық қызметтермен қатар, күндізгі немесе тәулік бойы стационарда емделуге, сондай-ақ МӘМС пакетіне кіретін операциялық көмекті алуға мүмкіндік алады.
Еске сала кетейік, МӘМС бойынша медициналық қызмет алу үшін азаматтың сақтандырылған мәртебесі болуы қажет.

Бала 18 жасқа толғаннан кейін сақтандырылған мәртебесін жоғалта ма?

Posted on by gpshu
💬 18 жасқа дейінгі балалар МӘМС жүйесінде мемлекет есебінен сақтандырылған. Сондықтан ата-аналарда бала кәмелет жасына толғаннан кейін оның сақтандыру мәртебесі сақтала ма деген сұрақ жиі туындайды.
Сақтандырылған мәртебесі келесі жағдайларда сақталады:
1. Егер бала 18 жасқа толса, бірақ оқуын күндізгі бөлімде (мектеп, колледж, жоғары оқу орны) жалғастырса, ол жеңілдік санатына жатады және мемлекет жарна төлеуді жалғастырады.
2. Егер мүгедектігі болса, жасына қарамастан, мемлекет жарналарды төлейді, себебі мүгедектігі бар адамдар жеңілдік санатына кіреді.
3. Егер 18 жастан кейін адам оқымаса және жұмыс істемесе, ол ресми түрде жұмыссыз ретінде тіркеле алады. Бұл жағдайда жарналарды жергілікті атқарушы орган төлейді.
Егер кәмелетке толған азамат ресми түрде жұмысқа орналасса немесе жеке кәсіпкер ретінде тіркелсе, ол жұмыс беруші есебінен немесе өз жарналары есебінен сақтандырылады.
Басқа жағдайларда сақтандырылған мәртебесін сақтау және МӘМС аясында медициналық көмек алу құқығына ие болу үшін, 18-ге толған азамат дербес төлеуші ретінде жарналарды өзі төлеуі қажет (2026 жылы – айына 4 250 теңге).

Мен жақында ресми жұмысқа орналастым. Енді МӘМС қашаннан бастап күшіне енеді?

Posted on by gpshu
Сақтандырылған мәртебесі қатарынан 12 ай (өткен немесе алдағы) үшін тұрақты төлем жасалған жағдайда беріледі.
Егер сіз бұған дейін ресми жұмыс істемесеңіз, жұмыссыз ретінде жеңілдік санатына кірмесеңіз және төлемді жеке төлеуші ретінде жасамаған болсаңыз, онда жұмысқа орналасқан күннен бастап бір жыл өткен соң сақтандыру мәртебесі беріледі.
Егер осы кезеңге дейін МӘМС бойынша медициналық көмек қажет болса, онда өткен 12 ай үшін төлем жасап, сақтандыру мәртебесін алуға болады.

Скринингтен кім және қашан өтуі керек?

Posted on by gpshu
Қазақстанның әрбір азаматы денсаулығына ешқандай шағымы болмаса да, профилактикалық тексерулер мен скринингтерден уақтылы өтіп отыруы тиіс.
Скринингтер тегін медициналық көмектің кепілдендірілген көлемі және міндетті әлеуметтік медициналық сақтандыру пакеттерінің шеңберінде тегін жүргізіледі. Айта кетейік, енді онкоскринингтер сақтандыру мәртебесіне қарамастан барлық азаматтарға қолжетімді.
Пациент скринингтен өз емханасында өте алады. Оған келесі жолдармен жазылады:
• емханаңыздың тіркеу бөлімінде,
• call-орталық арқылы,
• емханаңыздың мобильді қосымшасы немесе порталы арқылы.
Денсаулығыңызды қорғаңыз — скринингтен өтуді ұмытпаңыз!